Kisitsisit nutaat aalisarnermut tunngasut, aalisariuteqatigiinnut aalisarfikkaarlugillu immikkoorsitat 2020-mi ukiup affaa siulleq

Kalaallit Nunaanni Naatsorsueqqissaartarfik aalisarnermut naatsorsuutinik tabelinik nutaanik upernaaq 2020 saqqummersitsivoq. Tabelit nutaat tassaapput aalisarnermi pisat qaammatit pingasukkaarlugit agguakkat, avataasiortunut sinerissallu qanittuani aalisartunik, angallateqatigiikkuutaarlugit sumilu aalisarfinnut agguarlugit saqqummersitat. 

 

Saqqummermata ilimasaarutigineqarpoq qaammatit pingasukkaarlugit kisitsisit nutaat saqqummersinneqartalissasut. Ajoraluartumik kisitsisit atorsimasavut kukkuneqarsimammata 2020-mi qaammatit siulliit pingasut kisitsisitaat saqqummersinneqanngitsoorput, maannalu 2020-mi ukiup affaani siullermi saqqummerlutik.

 

Paasissutissat saqqummersitavut takussutissiipput aalisariuteqatigiikkuutaat sorliit atorlugit aalisakkat sorliit imartanilu sorlerni pisarineqartarnersut.

 

Maanna paasissutissat 2012-imiit ulloq manna tikillugu kukkunersiorneqareersimalerput, maluginiaqquarpulli 2018-imiit ukiullu tulliuttut kisitsigaagallartuummata.

 

Aalisariutit aalisariuteqatigiikkuutaannut makkununnga pingasunut agguarneqarput:

·         Kilisaatit (Avataasiorlutik aalisartut, uiluinniutit nunamillu qanittumi kinguppanniutit)

·         Aalisariutit (nunami qanittumi aalisariutit 6 meteriniit anginerusut)

·         Umiatsiat (Umiatsiat, qimussit, qamuteralaat ATV-it assigisaallu.)

 

Paasissutissat tonsiupput, igitat tunineqarsinnaanngitsullu ilanngullugit. Tunisinermi avataasiorlunilu aalisarnermi paasissutissani allaassutigaat aalisakkat taamaallaat ”tunineqarsinnaasut” pineqartarmata.

 

Imartat aalisarfiusut takussutissiaapput Kalaallit Nunaata eqqaani imartanilu allani aalisarfiusut aalisakkanillu sunik pisaqarfiusarnersut. Aammattaaq nunat allat aalisariutaasa Kalaallit Nunaata eqqaani imartani sorlerni aalisakkanillu sorlernik pisaqarnersut paasissutissiipput.